Silap pissusaani allannguutit - susoqartoruna?
Nunarsuarmi sumiiffippassuarni silap pissusaani allannguutinut suli oqaluuserinniinnartoqangaatsiarpoq. Aamma siusinnerusumut naleqqiullugu sila allanngorarnerullunilu sakkortunerusutut arlalissuit misigigaluarlugu.
Sumiiffinni allani silap pissusaani allannguutit assorsuaq pissusiviusutigut malugineqartuupput. Sumiiffiit ilagaat Issittoq – taamaattumillu aamma Kalaallit Nunaat. Tamaani allannguutit sunniutaat erniinnaarlutillu assorsuaq erseqqissuupput, aammalu IPCC-mit ACIA-millu siulittuutit eqquutissappata allannguutit qanoq sakkortutiginissaat takorlooruminarput – allaallumi 2009-mi marsimi Bella Centerimi Ilisimatuut Silap Pissusaa pillugu Ataatsimeersuarmata saqqummiunneqartutut silap pissusaata allannguutai suli malunniuteqarnerulissappata takorlooruminartuullutik.
Sikuusoq malunnaatilimmik qisuariartarpoq
Kalaallit Nunaanni sunniutip taama erseqqitsigineranut pingaarnerpaatillugu pissutaasoq tassaavoq nunap aamma immikkoortortap sikortarujussua, kissakkiartuaarneranut malunnaatilimmik qisuariartarluni, aammalu immami sikuusup sermersuullu tamarmik aakkiartortut imminni pisunik sakkortusaaqatallutik. Seqernup qinnguai siusinnerusumut naleqqiullugit annertoqataanik uterteqqinneqanngillat. Nunarsuup aamma imarpiit kissassuseq attannerulerpaat, taamaattumillu sumiiffinnut allanut naleqqiulluni annertunerusumik kissakkiartuaarfiuvoq.
Allannguuterpassuit
Pisoq ataaseq tassaavoq siku aattoq. Silalli pissusaani allannguutit arlalippassuarnik takussutissaqarfeqarput – sialuk/aput allanngorpoq, ukiuuneri sivikillipput, imarpiit sarfai allanngorneqarput, nunami immamilu uumasunut naasunullu atugassat sunniuteqarfiupput, tamakkulu inuup inuunermi atugassaanut assorsuaq aamma sunniutinik atugassaqartitsiffiulerput.
Quppernerni matumunnga atasuni Kalaallit Nunaanni allannguutit annerpaat ilaat nassuiarpavut. Paasissutissat tamakku ilisimatusarfittut ingerlatsivinnik siunissami silap pissusaanik allannguutinik nalunaarsuillutillu paasiniaanermik, taamaalillunilu ilisimasaqalernerulernissamik suliniuteqartunik qanimut attavilersorpavut. Tamannalu ilutigalugu ingerlatsiviit ilisimasarpassuarnik ilisimatusarnermilu inernerisarpassuarnik immersorlugit nittartagarpassuarnut linkit ilanngussorpavut.
