Nunat issittut imartaani immap sikua ukiut qulikkaat kingulliit ingerlanerini annikilliartorsimavoq. Immap sikua annertussutsimigut, issussutsimigut atasinnaassutsimigullu annikillisimavoq, taamaalillunilu sumiiffiit ammaannartunik imartallit allisimapput. Aakkiartornerup sukkaneruleqqinnissaa naatsorsuutigineqarpoq, tamatumalu nassatarisaanik ukiut untritilikkaat atukkatta qiteqqunneranni aasaanerani sikoqanngittalersinnaapput.
Immap sikuata annikilliartornerata atorsaannginneratalu kingunerisaanik aalisartut, piniartut inuussutissarsiutillu allat, sikumik atorfissaqartitsisut sunnerneqassapput, taamatullu immap ammaannartup angallavigineqarsinnaanera sunnerneqassalluni. Tamatuma saniatigut immap sikuata aakkiartornera, sumiiffiillu ammaannartumik imartallit annertunerulernerat kissarnermik tigooqqaanerup annertunerulerneranik kinguneqassaaq. Tamanna sumiiffinni Kalaallit Nunaata eqqaanniittuni silap immallu kissakkiartornerinik sakkortusititsissaaq, aakkiartornermillu annertusititseqqissalluni.
Immap sikuata annertunera Kalaallit Nunaanni inuuniarnikkut pissutsinut pingaaruteqartorujussuuvoq, aammalu allanngoriartornernut, siunissami nunani issittuni naatsorsuutigineqarsinnaasunut takussutissatut pingaaruteqarluni. Taamaattumik immap sikuata aakkiartornerani pissutsit tunngaviusut paasilluarneqarnissaat, aammalu immap sikusarnerata siunissami qanoq isikkoqarsinnaaneranik siulittuisinnaanissaq anguniarlugu ilisimatusartut ilisimatusarfiillu amerlasuut suleqataatinneqarput.
Uannga: NASA
Pinngortitaleriffik Kalaallit Nunaanni avatangiisini pissutsit akuutissanilu allannguutinik nakkutilliinermik isumagisaqarpoq, aammalu immap sikuata siaruarsimassusiani pissusiusunik nakkutilliiuarnermigut malinnaalluni. Nunami pinngortitaq uumasullu pillugit ilisimatusarnermi qitiusumik inissisimavoq, aammalu immami isumalluutillit uumassusillit immikkut sammisaralugit.
Kalallit Nunaanni Silap Pissusianik Ilisimatusarfik suliniutinik arlalinnik, immap sikuanut taassumalu siaruarsimassusianut sunniutaasartunik paasisimasanik amerlisaaffiusunik suliaqarpoq. Immap sikuata ilisimatusarfigineqarnerata saniatigut pinngortitamut inuiaqatigiinnullu ilisimatusarfiit arlallit ilisimatusarfigineqarput, akuttunngitsumillu Danmarkimi nunanilu allani ilisimatusarfiit suleqatigineqartarput. Silap pissusiani allannguutit Kalaallit Nunaanni avatangiisinut, pinngortitamut inuiaqatigiinnullu sunniutissaattut naatsorsuutigineqartut aallunneqarput.
#climategreenland