Naalagaaffeqatigiinneq

Naalakkersuisut danskit sila pillugu isumaqatigiissutinut oqartussaasutut ministeriaqarfiat qanimut suleqatigaat, aamma Silap pissusia pillugu isumaqatiginninniarnermi Naalagaaffeqatigiinnermi sinniisinut ilaasortatut isumaqatiginninniartutut peqataasarput.

2012-imi Naalakkersuisut silap pissusia pillugu isumaqatigiissutinut suleqatigiinnissamut danskit naalakkersuisui isumaqatigiissuteqarfigai, Namminersorlutik Oqartussaqarneq pillugu inatsit 2009-meersoq takuuk.  Kalaallit Nunaata kissaateqarneratigut suleqatigiinnissamut isumaqatigiissuteqartoqarpoq, Kalaallit Nunaanni Namminersorlutik Oqartussat silap pissusia pillugu politikki suliassaqarfittut tigunikuummagu, nunamilu silap pissusia pillugu politikkimik namminersortumik ingerlataqarmata, tamatumalu malitsigisaanik Namminersorlutik Oqartussat Kalaallit Nunaanni silap pissusia pillugu politikkimik aalajangiinissamik piginnaaneqarput.  Kisianni isumannaallisaanikkut, nunanullu allanut tunngasutigut politikki, matumani nunat tamat akornanni silap pissusia pillugu isumaqatiginninniarnerit naalagaaffiup oqartussaaffigivai, taamaalillunilu danskit naalakkersuisui piginnaaneqartuullutik. Taamaattumik FN-imi Silap pissusia pillugu isumaqatiginninniarnermi Kalaallit Nunaat namminersorluni isumaqatiginninniarsinnaanngilaq, kisianni Kunngeqarfik Danmarkimi isumaqatiginninniartartutut ilaasortaasunut ilaalluni. Suleqatigiinnissamut isumaqatigiissut aqqutigalugu isumaqatiginninniarnerup ingerlanerani, oqaloqatiginninnissat ilaatitsinissallu, Kalaallit Nunaannut attuumassuteqartunik paasissutissanik pisinnaalernissaq kiisalu isumaqatiginninniarnerni Kalaallit Nunaata ersarissunngortinnissaa qularnaarneqassapput.

Oqallinnermut peqataagit

#climategreenland