Silap pissusianut najoqqutassiat

Sermip qeqqani qillerinerit aamma ujarassiuut misissuinerat aqqutigalugu qanga silap pissusiata ineriartorneranik paasinnittoqarsinnaagaluartoq, siunissami silap pissusiani allannguutissat eqqoriassallugit ajornarneruvoq. Silap pissusianut najoqqutassiat siumullu missiliuinerit pissutaallutik ilisimatusartut siunissami silap pissusiata allannguutissaannik, taakkulu uagut, akuutissat pinngortitallu ataqatigiinnerinut sunniutissaannik eqqoriaanernik tunngavissalinnik saqqummiussisinnaapput.

Silap pissusianut najoqqutassiat qarasaasiat aammalu matematik atorlugu nassuiaatit, silap pissusianut paasissutissanik amerlalluinnartunik, uuttortaaviit aqqutigalugit katersorneqartunik ilaatitsiviusut atorlugit takorluukkanik misissussallugit pisariusunik imaqarput. Kalaallit Nunaanni sumiiffinni arlalinni uuttortaaveqarpoq, taakkununngalu ilisimatusarfiit Zackenberg aamma Nuuk ilaapput. Ataqatigiit assigiinngitsut imminnut sunneeqatigiittarnerat, taakkulu piffissap ingerlanerani allanngoriartornerat paasiniarlugu silaannaq, imaq, biosfære, aput sermerlu uuttortaavigineqartarput.

Kalaallit Nunaanni Silap Pissusianik Ilisimatusarfik DMI peqatigalugu nunap immikkoortuini immami, silaannarmi, nunami immanilu sermit iigartarfiini silap pissusianut najoqqutassiat ineriartortinneqarnerinut ikiuupput.

Silap pissusianut najoqqutassiat sakkussaapput pingaarutillit, allannguutissat ilimagisinnaasavut anigorniarlugit ikiortigisinnaasavut. Najoqqutassiani takutinneqarpoq, nunat issittut, taakkununngalu Kalaallit Nunaat ilaalluni, silap pissusiata allannguutaanit immikkut sunnerneqassasut, aammalu sermersuarmi silallu allannguutai matumani nunarsuarmi sumiiffinni allani allanngortoqarneranut sunniuteqassasut. Sermersuup aakkiartornerata kingunerisaanik immap qaffakkiartorneri tamatumunnga assersuutissaapput.

Erseqqissassallugu pingaaruteqarpoq, silap pissusianut najoqqutassiani eqqoriaanerit annertuumik nalorninartoqarmata. Paasissutissat amerlagaluartut, aammalu ataqatigiit assigiinngitsut sunniisarnerat paasisimalluarneqaraluartoq, siunissami sila kissarnerulerpat aammalu anorit immallu sarfai allanngorpata najukkani pissutsit qanoq ineriartussanersut oqaatigiuminaassinnaavoq.

Siunissami Kalaallit Nunaanni silap pissusaa qanoq isikkoqarsinnaanera uani takuguk.

Oqallinnermut peqataagit

#climategreenland