Sila, silap pissusia silaannarlu

Kalaallit Nunaanni silap pissusia allanngoriartorpoq. Imaq silaannarlu kissakkiartorput, aammalu siallertarnera nittaalartarneralu annertusiartorpoq, pingaartumik ukiuunerani. Nunap immikkoortuisa assigiinngissutaat annertupput, aammalu siunissami allannguutissanik eqqoriaasarnerit annertuunik nalorninartortaqarput. Issittumi illoqarfinni arlalinni aatsaat taama kiatsigisarpoq, taamaanneratalu kinguneranik aasat takinerullutillu panernerulerput, immallu sikuisa sermersuullu annikillinerannik kinguneqarluni. Sila allanngoriartuinnassaaq ilisimatusarnikkullu paasiniarneqarpoq qanoq allannguutit isikkoqassanersut.

Silap allanngoriartornera ilisimatusarfiginiarlugu piffissap sivisuup iluani silap allannguutai sukumiisumik malinnaaffigineqarput uuttortarneqarlutik. Paasissutissat katersorneqartut silap pissusianut najoqqutassianut atorneqarsinnaapput, taamaalillunilu siunissami ineriartornissaq tunngavissaqartumik eqqoriarneqarsinnaavoq. Kisiannili tunngavissat ataqatigiillu amerlasuut suli ilisimaneqanngillat, taamaattumillu ineriartornissamut siumoortumik missiliuinerit annertuumik nalorninartortaqarput.

Silap Pissusianik ilisimatusarfik DMI peqatigalugu sumiiffinni assigiinngitsuni silap pissusiata allannguutaanik paasinnikkusullutik najukkani nunallu immikkoortuini assigiinngitsuni silap pissusianut najoqqutassianik assigiinngitsunik suliaqarput. Ilaatigut silap pissusianut piviusuusaartitsilluni najoqqutassiat pitsaanerulersinniarlugit ineriartortippaat, aammalu ilisimatusarnerit aqqutigalugit allannguutit assigiinngitsut imminnut sunniutaannik paasinninnissaq annertusitinniarneqarluni. Assersuutigineqarsinnaasoq tassaavoq immat silaannaallu akornanni CO2-p nuuttarnerata misissorneqarnera, tamannami  silap allanngoriartorneranut sunniuttartunut fysiskimik kemiskimillu allannguutinut pingaaruteqarmat.

Asiaq aamma suliassanik silap pissusianut attuumassuteqartunik arlalinnik suliaqarpoq, aammalu ilisimatusarfinni Zackenberg aamma Nuuk Basic misissuisarnernut aaqqissuussanut ilaalluni. Silap pissusianik misissuinermut aaqqissuussani, KlimaBasis aamma GeoBasis silaannarmi pissutsit silap pissusianut attuumassuteqartut, nunap naqqa kuuillu, taamatullu silaannaap kissassusia, aputeqartarneq, nunap silaannaallu akornanni gassit silaannarmik kissakkiartortitsisartut sunneeqatigiittarnerat, kiisalu nunamiit erngup tarajoqanngitsup kuuttarnera pillugu misissuinerit arlallit ingerlanneqarput.

Tamatuma saniatigut uuttortaasarfiit amerlasuut, nittartakkami quppernermi Sermersuaq, Sermit Iigartartut aamma Sermillu Qeqqani Qillerinerit atuarsinnaavatit, aamma kissassutsip nittaallallu ineriartornerinik malinnaapput, aammalu Kalaallit Nunaanni, Danmarkimi nunanilu allani ilisimatusarfinnut annerusunut paasissutissanik pilersuisuullutik.

Oqallinnermut peqataagit

#climategreenland