Uumasut

Silap allanngorneranit uumasut nunamiittut immamiittullu sunnerneqassapput. Silap kiannerulernera, siallertarnerata nittaattarneratalu allanngorneri naasoqassutsimullu tunngatillugu pissutsit allanngorneri pissutaallutik uumasunut nunatsinniittunut imartatsinniittunullu atugassarititaasut allanngussapput.  Uumasut ilaat sunnernerlunneqassapput, ilaalli allamukarnermikkut imaluunniit naleqqussarnermikkut uumaannarnissaminnut periarfissaqalissapput. Pissutsit allanngornerisa kingunerannik uumasut nutaat takkussinnaapput, ataavartumik imaluunniit ukiup qanoq ilinera apeqqutaatillugu.

Pinngortitaleriffiup Kalaallit Nunaanni uumasunik ilisimatusarneq annertooq isumagisaraa. Pinngortitaleriffimmi Aalisakkat Uumasullu Qaleruallit pillugit immikkoortortaqarpoq aamma Uumasut Miluumasut Timmissallu pillugit immikkoortortaqarluni. Pingaartumik uumasoqatigiit inuiaqatigiinnut kalaallinut pingaaruteqartut ilisimatusarfigineqarput. Tamatuma nassatarisaanik immami soorlu, raajat, assagiarsuit, saarulliit, qalerallit, kapisillit suluppaakkallu misissuiffigineqarput. Taakkununngattaaq arferit, soorlu arfiviit, qilalukkat qernertat, qipoqqaat tikaagulliusaallu, kiisalu nannut ilaatinneqarput. Nunami uumasuni umimmaat tuttullu pingaartumik  soqutigineqarput. Taakku saniatigut timmissat, soorlu meqqit, appat nattorallillu aallunneqarput. Pinngortitaleriffiup ilisimatusarnermi saniatigut aamma pisortani oqartussaasunut siunnersuisarneq isumagisaraa.

Silap Pissusianik ilisimatusarfik uumasooqatigiinnik arlalinnik, soorlu saarullinnik, immap naqqata uumasuinik, tappiorannartunik – tassungalu ilanngullugu planktoninik – kiisalu tuttunik ilisimatusarfiuvoq. Suliaat amerlasuut uumasooqatigiit assigiinngitsut maanna siaruarsimaffiinik sumiiffinnut assiliornermut tunngasuupput, aammalu taakku silap allannguutaanut qanoq qisuariartarnerat pitsaanerusumik paasisaqarfiginiarlugu allannguutaasinnaasut malinnaaffigineqarput.

Kalaallit Nunaanni ilisimatusarfiit arlallit, soorlu Zackenberg aamma Nuuk-basic, tappiorannartut uumassusillit nakkutigineqarnerinut aammalu uuttortarneqarsinnaasunut silap pissusiinut attuumassuteqartunut aallaavigineqarput. Uumasut assigiinngitsorpassuit nunami, tatsini silaannarmilu uumasut allallu uuttortarneqarsinnaasut BioBasis -imit nalunaarsorneqartarput, uuttortaatillu taakku tamarmik Zackenberg-imi Nuummilu atorneqarput. Taamatuttaaq MarineBasis atorneqarpoq, tassanili taamaallaat immami pinngortitap ataqatigiinnera immallu uumasui aallunneqarput.

Taakku saniatigut issittup imartaani avatangiisit, Århus Universitetip ataani uumassusilinnut tunngatillugu ilisimatusarfimmi ilisimatusarfigineqartut pillugit annertunerusumik atuagaqarsinnaavutit, uani.

Oqallinnermut peqataagit

#climategreenland