Suleqatigiinneq ilisimatusarnernik tunngaveqartoq

Kalaallit Nunaanni silap pissusianik ilisimatusarnikkut assigiinngitsunit aammalu nunanit tamalaaneersunit, danskit kalaallillu nunaasa killeqarfii akimorlugit suleqatigiiffiuvoq. Kalaallit Nunaanni Silap Pissusianut Ilisimatusarfiup pingaartumik Canadami, Norgemi, Danmarkimi kiisalu nunani issittuni nunani allani ilisimatusarfiit suleqatigai.

Arctic Science Partnership tassaavoq suliniut nutaamik aallartinneqarsimasoq, nunani issittuni silap pissusianut tunngatillugu ilisimatusaatinik ilinniartitsissutinillu katersuiffiusussaq. Suliaq Kalaallit Nunaanni Sila Pissusianut Ilisimatusarfiup, Århus Universitetip aamma University of Manitoba-p suleqatigiinnerisigut pilersinneqarpoq sulilu ineriartortinneqarluni. Arctic Science Partnerships ilisimasanik aveqatigiittarnermut, suleqatigiinnermut ataatsimullu ilisimatusarnermut aqqutissiuisussaavoq, piffissallu ingerlanerani aamma ilisimatusarfiit allat ilaatinneqalernerisigut annertusineqarsinnaalluni. Suleqatigiinneq pillugu atuagaqarsinnaavutit, uani.

Nunani Issittuni Siunnersuisoqatigiit nunarsuup immikkoortuani silap pissusianik ilisimatusarnikkut suleqatigiinnermut pingaarutilittut maligassiuisuuvoq. Siunnersuisoqatigiit ilaatigut nalunaarusiat Arctic Climate Impact Assessment – imaluunniit ACIA – 2005-imi saqqummersoq, Snow, Water, Ice and Permafrost in the Arctic – SWIPA – 2011-imeersoq aammalu Adaptation Actions for a Changing Arctic – AACA – 2017-imi saqqummernissaa naatsorsuutigineqartoq suliarisimavai. Nalunaarusiani pingasuusuni taakkunani ilisimatusaqatigiit, nunani issittuni tamarmiusuni nunanit tamalaaneersut, aammalu assigiinngitsorpassuarnik suliaqartut tunuliaqutarineqarput. Kalaallit Nunaanniit Silap Pissusianik Ilisimatusarfimmi aamma Ilisimatusarfimmi ilisimatusartut tapersiisimapput, taamatullu danskit ilisimatusartut arlallit, immikkut Kalaallit Nunaannik ilisimasaqartut suleqataasimallutik.

ACIA, SWIPA aammalu AACA pillugit ‘Nunani Issittuni Siunnersuisoqatigiit’ ataani, kiisalu nittartakkami quppernerni ukunani annertunerusumik atuagaqarsinnaavutit:

Arctic Climate Impact Assessment – ACIA – 2005
Snow, Water, Ice and Permafrost in the Arctic – SWIPA – 2011
Adaptation Actions for a Changing Arctic – AACA – 2017

DANCEA nunani issittuni avatangiisinut silallu pissusianut tapersiisarfiuvoq, Nunani Issittuni Siunnersuisoqatigiinni Naalagaaffeqatigiit pisussaaffimminnik naammassinninnissaannut qulakkeerinissaannut tapertaasussaq. Silap pissusianut tapersiisarnermut pilersaarut Danmarkimi Nukissiuuteqarnermut Aqutsisoqarfimmit aqunneqarpoq, Namminersorlutik Oqartussat tusarniaaffigineqartarlutik. Aaqqissuussinermi silap pissusianik ilisimatusarnermi suleqatigiit arlalissuit, Kalaallit Nunaanni aallaaveqartut tapersiiffigineqarsimapput.

Oqallinnermut peqataagit

#climategreenland