Silap pissusia pillugu nunat tamalaat isumaqatigiinniarnerat

FN-ip Silap pissusia pillugu isumaqatigiissutaa (UNFCCC)

Kalaallit Nunaat Kunngeqarfimmut Danmarkimut ilaanermigut FN-ip Silap pissusia pillugu Isumaqatigiissutaanut (UNFCCC) ilaavoq, tassanilu nunat tamalaat akornanni gassinik kissatsitsiartortunik aniatitsinerup millisarneqarnissaanut isumaqatigiissutituaavoq. Silap pissusia pillugu isumaqatigiissut tassaavoq isumaqatigiissut gassit silaannarmik kissatsitsiartorlutik inunnut ajoqutaalinnginneranni aniatitsinerup annikillillugu aalajaallisarnissaanut tunngasoq. Silap pissusia pillugu isumaqatigiissummi peqataasunut millisaanissamik pituttuisuunngilaq.

Kyoto-mi isumaqatigiissut Sila pillugu isumaqatigiissutip ataaniittoq pituttuisuusorlu aniatitsinermik millisaanissamut isumaqatigiissutinik pituttuisunik imaqarpoq.  Kalaallit Nunaat Danmarkimut isumaqatigiissuteqarnikkut Kyoto-mi isumaqatigiissummi pisussaaffiliinermi siullermi (2008-2012) imminut pisussaatippoq.  Piffissap aappaani pituttuisuusumi (2013-2020) Kalaallit Nunaata aniatitsinermik millisaanissamut pisussaatinngilaq, tassanilu peqqutigineqarpoq piffissami tassani Kalaallit Nunaanni aningaasaqarnikkut suliffissuaqarnikkullu siuariartornissamut anguniakkat isiginiarneqarsimammata.

FN-imi isumaqatigiittut nunarsuaq tamakkerlugu silap pissusianut tunngasumik nutaamik COP21-imi Paris-imi 12. december 2015-imi isumaqatigiittoqarpoq. Isumaqatigiissut silap pissusia pillugu isumaqatigiissummut inatsisitigut pituttuisussamut Kyoto-mi isumaqatigiissutip atorunnaarnerani nunarsuaq tamakkerlugu 2020-p kingorna atuutilersussamut sinaakkusiisussaavoq.

Naalakkersuisut 31. marts 2016-imi aalajangerput Kunngeqarfik Danmark Paris-imi isumaqatigiissummut atuutsitsilerpat Kalaallit Nunaannut tunngasumik nangaanartoqartitsiniarlutik. Tunuliaqutaasoq tassaasimavoq Kalaallit Nunaata siunissami inuiaqatigiinni aningaasaqarnikkut ineriartorneranut isumaqatigiissut naammattumik qularnaarinninngitsutut nalilerneqarmat. Isumaqatigiissut taamaalilluni inoqqaat pisinnaatitaaffiinut innersuussilluni, matumani ineriartornissamut pisinnaatitaaneq, inatsisitigut pituttuisuunngilaq. Kalaallit Nunaat taamaalilluni millisaanissamut Paris-imi isumaqatigiissummut attuumassutillit pisussaaffilernerannut ilaatinneqassanngilaq.

Nunap immikkoortuanut nangaassuteqarnerup Kalaallit Nunaata FN-ip Silap pissusia pillugu isumaqatigiissutaata ataaniittumut nalunaartussaatitaanera allanngortinngilaa, taamaalillunilu Kalaallit Nunaat ukiumoortumik nuna tamakkerlugu gassinik silaannarmik kissatsitsisartunik aniatitsinini Sila pillugu isumaqatigiissummut tunngasunut nalunaaruteqartassaaq.

Oqallinnermut peqataagit

#climategreenland