Nunani Issittuni Siunnersuisoqatigiit

Kalaallit Nunaat Nunani Issittuni Siunnersuisoqatigiinni silap pissusia pillugu suleqatigiinnermut ilaavoq. Pingaartumik suleqatigiissitaq Arctic Monitoring and Assessment Programme (AMAP) aqqutigalugu Kalaallit Nunaat silap pissusianik suliassaqarfimmi ataqatigiissaarinermut suleqataavoq, aammalu nalunaarusiat Arctic Climate Impact Assessment (ACIA) og Snow, Water, Ice and Permafrost in the Arctic (SWIPA) suliarineqarnerinut ilanngussaqarsimalluni.

Nalunaarusiat taakku pingasut pillugit annertunerusumik atuagaqarsinnaavutit, uani:

  • Arctic Climate Impact Assessment (ACIA) 2005-imi saqqummerpoq, taannalu silap pissusiata allannguutaasa nunanut issittunut qanoq sunniuteqarnerinut misissuinerit annerit akuutitsiviusullu siullersaraat. Nalunaarusiami suliassaqarfiup iluani assigiinngitsuni suliallit ilisimasaasa pioreersut katersorneqarnissaat siunertarineqarpoq, nunanut issittunut naalakkersuinikkut suliaqarnissamut tapersersuinissaq siunertaralugu. Nalunaarusiami suliassaqarfiup iluani pinngortitami, peqqissutsimi inuiaqatigiinnilu ilisimatusarnermi ilisimasat sammineqarput. Silap pissusiata allannguutai taakkulu sunniutai nunarsuarmi sumiiffinnut allarpassuarnut naleqqiullutik nunani issittuni malunnarnerpaasut tassani inerniliissutigineqarpoq. Nalunaarusiami tunuliaqutaasut inerniliissutaasullu pingaarnerit pillugit annertunerusumik atuagaqarsinnaavutit, uani. Inerniliissutaasunit amerlasuut eqqortuusut paasineqarpoq, kisiannili allanngoriartuutit naatsorsuutigisamit sukkanerupput, aammalu ilisimatusartunut amerlasuunut tupaallatsitsisimallutik. Taamaalilluni tamatumuunakkut Nunani Issittuni Siunnersuisoqatigiit silap pissusia pillugu nalunaarusiassaannut angisuumut tullermut aqqutissiuussisoqarpoq.
  • Snow, Water, Ice and Permafrost in the Arctic (SWIPA) 2008-miit 2011-mut suleqatigiissitap AMAP-ip, nunarsuarmi ilisimatusarfiit siuttuusut, kiisalu nunani issittuni nunat inuiisa sinniisaat suleqatigalugit suliaraa. ACIA-mut ilassutitut, silap pissusiata allannguutaasa qanoq ilillutik nunani issittuni pinngortitaq, immikkoortumilu tassani inuiaqatigiinni atukkat sunniutigisinnaasai nalunaarusiami sammineqarpoq. Videonit pingasuusunit, SWIPA-mi inerniliissutaasunik pingaarnernik eqikkaaffiusunit tigulaakkat takusinnaavatit, uani. Filmit ilaanni silap pissusiata allannguutaasa Kalaallit Nunaanni sermersuarmut sunniutai immikkut oqaluttuarineqarput, tassanilu silap pissusiata allannguutaasa inuiaqatigiinnut kalaallinut sunniutissaattut naatsorsuutigisat pillugit annertunerusumik tusagaqarsinnaavutit. 2017-ip ingerlanerani naatsorsuutigineqarpoq SWIPA nutartigaq saqqummersinneqassasoq.
  • Adaptation Actions for a Changing Arctic (AACA) silaannaap allanngoriartorneranut naleqqussarnermut tunngavoq 2017-illu ingerlanerani saqqummersinneqarnissaa naatsorsuutigineqarluni.

Oqallinnermut peqataagit

#climategreenland