Peqqissuseq

Silap pissusiata allanngornerani pinngortitaq najugarput, avatangiisivut inuiaqatigiillu aningaasaqarnerat kisimik eqqorneqartussaanngillat. Ilisimatusarnermi nutaami nunani issittuni silap pissusiata allannguutaasa peqqissutsimut sunniutissai aallunneqarput.

Kalaallit Nunaanni ilisimatusarnerpianik suli ingerlatsisoqanngilaq, kisiannili Canadami USA-milu paasisat aamma kalaallinut naleqarsinnaapput, aammalu sumiiffinnut immikkut ittumik eqqumaffigineqartariaqartunut takussutissiisinnaallutik. Silap kiannerulernerani nappaatit nutaat takkussinnaapput, sapikkat nutaat pinngorsinnaallutik, inuillu amerlasuut inuussutissatigut tunngavigisaat allanngorsinnaallutik.

Arctic Climate Impact Assessment ACIA – 2005-imeersoq kapitalimik Inuit Peqqissusiannut tunngasumik ilaqarpoq. Kapitalimi silap pissusiata allannguutaasa peqqissutsimut, kiisalu silap pissusiisa allanngoriartortut nalaanni inuunerup tarnimut inooqatigiinnermullu sunniutissai annertunerusut toqqaannartumik toqqaannanngitsumillu sunniutissai sammineqarput. Tamatuma saniatigut unammilligassat suussusersineqartut qanoq iliorluni anigorneqarnissaat oqaluuserineqarpoq, aammalu ineriartorneq uuttortarniarlugu tunngavissanik assigiinngitsunik takussutissiornissaq siunnersuutigineqarpoq. Kingullermik nunani issittuni inuiaqatigiinni, silap pissusiata allannguutaanik sunnersimaneqartuni peqqissutsimut iliuusit ingerlaqqinnissaannut inassuteqaatinik arlalinnik saqqummiussisoqarpoq. Kapitali nassaarineqarsinnaavoq uani.

US National Library of Medicine-p ataani Iserfissiaq Arctic Health suliassaqarfimmit tassannga najoqqutassanik amerlalluinnartunik katersaateqarpoq. Nittartakkami qupperneq arlalinnik immikkoortortaqarpoq, soorlu Inuussutissatigut isumannaassuseq, Uumasut assigiinngissitaarnerat Peqqissuserlu, Patogener-it nutaat, Imeq Eqqiluisaarnerlu, Silaannaap pitsaassusia aammalu Ississutsit kissassutsillu sakkortuut, Utoqqaat Meeqqallu, Tarnikkut Peqqissuseq Inuillu peqqissusiat.

Ilisimatusarnikkut allakkianut, nalunaarusianut videokkullu oqalugiarnernut innersuussisoqarpoq, taakkunanilu pingaarnertut Canada Alaskalu siunnerfigineqarput.

Inuit Circumpolar Council 2010-miit 2014-imut peqqissutsimut suliniutissat pillugit naqitamik 2010-mi saqqummiussivoq. Suliniummi nunani issittuni tamani Inuit peqqissusiat sammineqarpoq, ilaatigullu aamma silap pissusiata allannguutai tunngavissatut pingaarutilittut, eqqarsaatigineqartariaqartutut ilaatinneqarput. Suliniutissat nassaarineqarsinnaapput, uani.

Aammattaaq suleqatigiissitaq Issittormiut Siunnersuisoqatigiit ataaniittoq Arctic Monitoring Assesment Programme (AMAP) 2015-imi saqqummersippaat Human Health in the Arctic – nalunaarusiaq Nunat Issittut Akornanni inuit peqqissusiannik misissuisoq.

Oqallinnermut peqataagit

#climategreenland