Nunani tamalaani pisussaaffiit

Parisimi COP21-qarnerani FN-ip silap pissusia pillugu isumaqatigiissutaanut peqataasut nunarsuaq tamakkerlugu silap pissusia pillugu isumaqatigiissuteqarput. Silap pissusia pillugu isumaqatigiissutip imarai nunarsuup kissakkiartornerata gradit marluk ”ataaniitinneqarnissaanik” piffissaq sivisooq eqqarsaatigalugu anguniagaqarneq aamma kissakkiartornerata gradit aappaata affaanut killiliisumik iliuuseqarfigineqarnissaanik kaammattuuteqarneq.

 

Naalakkersuisut ulloq 31. marts 2016 aalajangerput isumaqatigiissutip atortussanngortinneqarneranut atatillugu Parisimi isumaqatigiissummut tunngatillugu Danmark nunatut nangaassuteqarnissamut qinnuigineqassasoq. Taamaalilluni nunatut nangaassuteqarnerup nassataanik Kalaallit Nunaat nunat tamalaat annikillititsinissamut pisussaaffeqarnerannut ilaatinneqassanngilaq.

 

Naalakkersuisut COP21 sioqqullugu Inuussutissarsiornermut, Suliffeqarnermut, Niuernermut Nunanullu Allanut Naalakkersuisumut piginnaatitsissutaanni piumasaqaataavoq Kalaallit Nunaata silap pissusia pillugu isumaqatigiissummut kingusinnerusukkut ilaalernissaa, tamannalu pissasoq Kalaallit Nunaanni siunissami aningaasaqarnikkut imminut napatittumik ineriartortitsinissamik kissaateqarneq eqqarsaatigalugu.

 

Taamatut Kalaallit Nunaanni siunissami aningaasarsiornikkut ineriartortitsinissaq pillugu Kalaallit Nunaannut eqqarsaatiginninneq ilaatigut nunat inoqqaavisa pisinnaatitaaffiinut innersuussinikkut akuerineqarsinnaavoq, tassunga ilanngullugu nunat inoqqaavisa ineriartornissamut pisinnaatitaaffii, Kunngeqarfiup Danmarkip – kalaallit kissaateqarnerat malillugu – aamma Parisimi isumaqatigiissuteqarnissaq tikillugu ukiuni kingullerni silap pissusia pillugu isumaqatigiinniarnerni saqqummiuttuartarsimasaa.

 

Nunalli inoqqaavi pillugit pituttuisumik oqaasertaliinissamut tapersersortissarsinissap qularnaarniarneqarnera iluatsinngitsoorpoq aamma silap pissusia pillugu isumaqatigiissut nutaaq nunat inoqqaavisa pisinnaatitaaffiinut imaluunniit nunap inoqqaavisa ineriartornissamut pisinnaatitaaffiinut inatsisitigut pisussaaffiliisumik innersuussinertaqanngilaq. Aallaqqaasiussamili nunat inoqqaavinut tunngatillugu isumaqatigiissummi oqaasertaliussaq innersuussutigineqarpoq, tassani erseqqissaatigineqarpoq nunat silap pissusia pillugu suliniutiminnik siuarsaanerminni nunat inoqqaavisa pisinnaatitaaffii illersorlugillu ataqqissagaat aamma silap pissusiata allanngoriartorneranut naleqqussaanissaq pillugu isumaqatigiissutip immikkoortuani takuneqarsinnaavoq naleqqussaanermut atatillugu ilaatigut nunat inoqqaavisa ilisimasaat eqqarsaatigineqassasut.

 

Naalakkersuisulli isumaqarput innersuussutit taakku naammaginanngitsut aamma Naalakkersuisut silap pissusianut tunngatillugu ataatsimeersuarnissaq sioqqullugu Inuussutissarsiornermut, Suliffeqarnermut, Niuernermut Nunanullu Allanut Naalakkersuisumut piginnaatitsissutaanni allassimasutut Kalaallit Nunaanni siunissami suliffissuaqarnikkut ineriartortitsinissaq pillugu kissaateqarneq innersuussutit qularnaarinneqataaffigisinnaanngilaat.

 

Kalaallit Nunaat Danmarkimik peqateqarluni FN-ip silap pissusia pillugu isumaqatigiissutaanut ukiut sisamakkuutaarlugit suli nalunaaruteqartarpoq. Nalunaarummi – aamma Nunap Nalunaarutaanik taaneqartartumi – aniatitsinerit pillugit kisitsisitigut paasissutissat, aniatitsinerit annikillisarniarlugit suliniutit ataatsimoortillugit katersorneqartarput silallu pissusiata allanngoriartornerata Kalaallit Nunaannut Danmarkimullu qanoq sunniuteqartarneranik oqaluttuartuusarluni.

 

Silap pissusia pillugu isumaqatigiissummi anguniakkat pillugit Kalaallit Nunaat tamakkiisumik tapersersuivoq – sulilu silap pissusia pillugu isumaqatigiissummut tamakkiisumik ilaalluni – naammagisimaarnerarpaalu suliffissuaqarfiunngitsuni kissakkiartornerup annertussusiata 2 gradi celciusip ataaniitinnissaa anguniarlugu nunarsuarmiut pituttuisumik isumaqatigiissuteqarnerat Parisimi isumaqatigiissuteqarnikkut iluatsinneqarmat.

 

Issittormiunut tamanna annertuumik pingaaruteqarpoq, tassa maannakkut kissakkiartornerit takutimmassuk nunarsuup sinneranut naleqqiullugu Issittoq marloriaammik sakkortutigisumik eqqorneqartoq. Kalaallit eqqarsaatigalugit aamma nunat inoqqaavi allat pinngortitami inuusut eqqarsaatigalugit tamanna annertuumik isumaqarpoq.

Oqallinnermut peqataagit

#climategreenland