Inuiaqatigiit, Suliffeqarfiit aamma CSR

Inuiaqatigiit

Inuiaqatigiit tassaapput silap allanngorneranut tunngatillugu oqallinnermut pingaarutilimmik tunniussaqartartut, siunissami silap allanngornerata kinguneranik qanoq pitsaanerpaamik iliorsinnaanersugut. Silap allanngoriartornera pillugu oqallinnermut pingaarutillit marluk tassaapput Inuit Circumpolar Council (ICC) aamma WWF nunarsuarmi pinngortitamut fondi. Taakku marluullutik pisortatigoortumik silap pissusia pillugu oqallinnermut nukittorsaanissamik suliaqarput, kajumissaarutigisarlugulu aniatitatta millisarnissaannut tamatta akuussasugut.

Suliffeqarfiit aamma CSR
Kalaallit Nunaanni silap pissusianut akisussaaffeqarnissaq suliniuteqarnissarlu eqqartorneqartillugu suliffeqarfiit pingaarutilimmik inissisimapput. Suliffeqarfiit arlallit silap pissusianut politikkinik ersarissunik ilusilersuereerput, aammalu CO2-nik aniatitaminnik annikillititsiniarlutik suliniuteqarput aammalu suliaminni nukissiuutinik atuinermik pitsanngorsaallutillu nalunaarsuillutik.

CSR – imaluunniit Corporate Social Responsibility – tassaavoq suliffeqarfiit inuiaqatigiinnut sunniutaat, taakkuuppullu inuiaqatigiinnut sunniutit pitsaanngitsut millisarnissaannut pitsaasullu amerlisarnissaannut akisussaaffeqarnerminnik takutitsisut, tassanittaaq avatangiisit silallu pissusianut sunniutit ilaapput. CSR-imi aamma suliffeqarfiit inuiaqatigiillu akornanni imminut pisariaqartinneq takutinneqarpoq, tassami inuiaqatigiit ineriartussagunik suliffeqarfinnik ingerlalluartunik pisariaqartitsipput, suliffeqarfiillu ingerlalluassagunik ineriartortitseqataassagunillu inuiaqatigiinni pitsaasumik ingerlasoqarnissaanik pisariaqartitsipput.

Peqatigiiffik CSR Greenland 2010-mi pilersinneqarpoq, Kalaallit Nunaanni suliffeqarfiit arlallit suleqatigalugit. 2017-imi peqatigiiffik 50-inik ilaasortaqarpoq, siulersuisuutitaqarlunilu allaffeqarpoq. Avatangiisit pillugit suliniutit peqatigiiffiup salliutippai, kisiannili peqatigiiffiup siunertarisai avatangiisit pillugit silallu allanngorarnerinnaaniinngillat. Peqatigiiffiup attaveqaqatigiinneq tunaartarivaa , taannalu suliffeqarfiit, oqartussat ataanni kattuffiit inuiaqatigiillu akornanni nutaaliornissamut suleqatigiinnissamullu pingaaruteqarluinnarluni.

Kalallit Nunaanni suliffeqarfiit silap allanngorneranut aamma CSR pillugu pingaartitaqartut uani takuneqarsinnaapput.

Oqallinnermut peqataagit

#climategreenland